Saga Landspítalans
Elsti hluti Landspítalans, sem tekinn var í notkun 1930, var teiknaður af þáv. húsameistara ríkisins, Guðjóni Samúelssyni. Tilurð Landspítalans var árangur af langri og harðri baráttu þar sem konur voru í fararbroddi og hafa þær æ síðan haft frumkvæði að mörgum framkvæmdum í sjúkrahúsmálum í landinu.
Þó svo að nýr Landspítali rísi á nýjum stað má sýna hinni sögufrægu byggingu við Hringbraut viðhlýtandi virðingu og fá því nýtt hlutverk. Efna mætti til hugmyndasamkeppni um verðugt og viðeigandi framtíðarhlutverk húsins. Vafalaust kæmu margar góðar hugmyndir. Meðal þess er sögusafn kvennabaráttunnar og lækninga á Íslandi, aðalskrifstofa Velferðar- eða Heilbrigðisráðuneytisins, aðsetur Landlæknis og heilsugæslustöð hverfisins.
Saga Borgarspítalans – Landspítalans Fossvogi
Rætt við dr. Friðrik Einarsson, fyrsta yfirlækni skurðdeildar Borgarspítalans í Fossvogi.
Landspítalinn 1930 – 1998
Ágrip af sögu Landspítalans 1930 – 1998, Árni Björnsson, 15. janúar 1998Landspítalinn í Reykjavík tók til starfa 20. des. 1930. Hugmyndir um sjúkrahús sem þjónaði öllu landinu voru þó ekki nýjar, því árið 1863 lagði Jón Hjaltalín þáv. landlæknir fram frumvarp á Alþingi um slíkan spítala en frumvarpið hlaut ekki afgreiðslu.
Á tímabilinu frá 1863 – 1930 voru nokkur sjúkrahús rekin í Reykjavík: Sjúkrahús Reykjavíkur 1866 fram yfir aldamót, St. Jósepsspítalnn Landakoti, 1902 – 1996, Kleppsspítalinn (geðveikrahæli) 1907 sameinaður Ríkisspítölunum og síðar Landspítalanum. Franski spítalinn 1904 – 1927, Sóttvarnarhúsið, 1903 – 1954, Vífilsstaðahæli og Farsóttarhúsið, 1920 – 1969. Tilurð Landspítalans var árangur af langri og harðri baráttu þar sem konur voru í fararbroddi og hafa þær æ síðan haft frumkvæði að mörgum framkvæmdum í sjúkrahúsmálum í landinu. Í hornstein spítalans sem lagður var 15. dag júnímánaðar 1926 af Hennar hátign drottningu Alexandrinu standa eftirfarandi orð, m.a. “Hús þetta – LANDSSPÍTALINN- var reistur fyrir fje, sem íslenskar konur höfðu safnað og Alþingi veitt á fjárlögum til þess að: LÍKNA OG LÆKNA.”Nánar má lesa um sögu Landspítalans hér.