Ef staðsetja á spítalann í samræmi við markmið Aðalskipulags Reykjavíkur 2010-2030 (AR 2010-2030) um jöfnun umferðar ætti að finna honum stað sem stuðlar að styttri ferðatíma og minni umferð.
Landspítalinn er risastofnun. Auk starfsemi á Hringbraut er Landspítalinn með starfsemi í Fossvogi og á um 17 stöðum á höfuðborgarsvæðinu. Fari svo að starfsemin flytjist öll á Hringbraut verða ferðir starfsmanna, nemenda, sjúklinga, aðstandenda og þjónustuaðila til og frá spítalanum um 18.000 á sólarhring eftir sameiningu og mun fjölga næstu ár og áratugi. Þar af verða að meðaltali um 100 sjúkrabílar á sólarhring og allt að 200 á álagstímum. Í mörgum tilvikum skiptir vegalengd á bráðadeild miklu um bata sjúklinga.
Umferðarspá 2040. Staðsetning spítalans þarf að vera miðsvæðis og liggja vel við megin umferðargötum. Stæstu gagnamót landsins eru Miklabraut, Vesturlandsvegur / Sæbraut, Reykjanesbraut.
Sjúkrabílar sem aka langa leið gegnum borgina í forgangsakstri með ljós og sírenu valda truflunum fyrir vegfarendur og íbúa. Leið sjúkrabíla á spítalann verður mun greiðari og að jafnaði styttri ef hann er til dæmis við ósa Elliðaánna. Þar verður þyrluflug einnig hættuminna og veldur minni truflunum.
Með sameiningu á Hringbraut eykst umferðin á svæðinu um meira en 12% til að byrja með og meira síðar. Þessi mikla umferðaraukning mun valda gríðarlegum umferðarteppum og vanda sem aðeins verður leystur með gríðarlega kostnaðarsömum gatnaframkvæmdum. Þessi mikla umferðaraukning verður ofraun fyrir gatnakerfið við Hringbraut.
Best er því að færa þennan mannfrekasta vinnustað landsins austar í borgina, nær þungamiðju búsetu. Þannig minnka umferðartafir, ferðatími styttist og umferðamannvirki nýtast betur.